pidato

Nyampekake Pambagyaharja Pasrah Penganten

Acara manten ing Jawa Tengah, mligine ing Surakarta nduweni urut rinonce tata upacara menawa sakdurunge ana pasrah paningset, iku mratandani menawa lamaran calon temanten kakung diaturake, banjur ana panampi paningset yaiku atur piwales saka calon temanten putri. Manawa laku tata upacara wus nganti semono, mesti tanggal lan dina pahargyan wis ditemtokake marang kaluwarga, mula menawa teka titiwancine panggih temanten, ana duta saka calon temanten kakung kang masrahake temanten kakung.

Ukara kang dinggo ing tanggap wara pasrah temanten kakung iku nggunakake basa krama inggil. Menawa durung lancar anggone micara ing ngarepe wong akeh nganggo basa krama, amrih becike tanggap wara iku katulis dhisik. Kang prelu digatekake nalika nulis tanggap wara kanggo pasrah temanten kakung yaiku:

a.     Gatekna kanthi temenan upacara apa kang arep katindakake

b.    Ngertenana jenenge kang kagungan kersa, kang ngutus, temanten kakung, lan temanten putri.

c.     Telitinen maneh teks kang wis mbok tulis supaya ora kleru nyebutake jeneng kang jejibahan karo acara.

d.    Menawa ora mangerteni makna/arti tembung ora usah nggunakake tembung kuwi sanajan tembung kuwi lumrah mbok rungokake.

Kanggo tuladha panulisane pasrah temanten kakung, coba gatekna teks ing ngisor iki!

Kula nuwun

Assalamu’alaikum Wr.Wb

Saha anggambali matur, mugi kawilujengan karaharjan, minggahipun katentreman tansaha kajiwa, kasarira ing hangga panjenengan lan kula.

Kepareng matur dhumateng para tamu kakung saha putri ingkang kinurmatan, mligi dhumateng panjenenganipun Bp. Aryo Puto ingkang minangka sulih saking panjenenganipun Bp. Indra Arjuna sekalian, mugi wonten keparengipun, kula kalilanana matur sawetawis dhumateng ngarsa panjenengan.

Menggah wigatosing hanggen kawula sowan wonten ing samadyaning pahargyan menika, langkung rumiyin sakderengipun kawula nglajengaken atur, sumangga tansah mboten kendhat kawula dherekaken sesarengan muji syukur wonten ngarsa dalem Gusti Ingkang Akarya Jagad, ingkang sampun kepareng paring pinten-pinten kanikmatan dhumateng panjenengan sedaya.

Inggih awit saking kamirahanipun Pangeran Ingkang Maha Kuwaos, kula lan saksedherek saged sowan wonten ing samadyaning pahargyan dinten menika kanthi wilujeng mboten wonten alangan satunggal punapa.

Ing salajengipun kula kepareng matur mlige dhumateng panjenenganipun Bp Aryo Putro minangka sulih saking ingkang hamengku damel, langkung rumiyin kula hangaturaken salam taklin saking panjenenganipun Bp. Palgunadi Riyanto sekalian mugi ing mangke kahaturna dhumateng ingkang hamengkugati. Ing salajengipun kula ingkang minangka duta saraya pamungkas saking panjenenganipun Bp Aryo Putro ingkang minangka sesulih saking ingkang hamengku gati.

Menawi sakawit, kula hangaturaken calon temanten kakung pun Bg. Krisna Dwipayana kepareng kajibahaken dumugi wekdal punika kula hatur pasrah penganten kakung mugi ing mangke keparenga kapanggihaken kalian putra-putrinipun Bp. Indr Arjuna sekalian ingkang asesilih Rr. Resti Kirana menggah panggulawentah sawetahanipun kawula sumanggakaken dhumateng panjenengan sakadang.

Boten kesupen, kula ingkang minangka duta saking panjenenganipun Bp. Palgunadi Riyanto sekalian, kagalih wonten kirang suba sitaning hanggen kawula sowan saksederek, kula ingkang minangka sesulih, sedayanipun nyuwun agunging pangapunten.

Cekap semanten nuwun....maturnuwun

Wassalamu’alaikum Wr.Wb