nulis naskah

Nulis Naskah Drama

Karya sastra siji lan sijine nduweni ciri kang bisa mbedakake bentuke. Menawa sampeyan nggatekake, antarane gancaran, geguritan, lan drama ana kang mbedakake. Gancaran iku karya sastra kang awujud tulisan dawa kang digawe bentuk paragraf. Geguritan yaiku tulisan kang ngemu makna kang ora bisa wantah dionceki, nanging kudu dipahami. Menawa drama wujude dhialog. Ana naskah kang kanggo cekelan pemain menawa naskah kuwi arep dipentasake. Sakdurunge naskah iku dipentasake awake dhewe durung bisa marapi drama kuwi. Dadi intine drama iku naskah dhialog kang ditulis rinci, banjur dipentasake ing panggung supaya isa ditonton wong liya.

Awit jaman Kanjeng Sinuhun Paku Buwana X wis ana pentas drama. Rikala semana isih winates kerabat Keraton kang oleh nonton. Suwene suwe, pentas iku dibukak kanggo umum. Dianakake neng gedung pertunjukan kaya ing Balekambang lan Sriwedari. Jaman kuwi sing dipentasake winates crita wayang, mula diarani wayang wong. Majune jaman ndadekake majune crita kang dipentasake. Saiki ning Balekambang kang dipentasake dudu wayang wong, nanging kethoprak.  Iku uga salah sijine conto drama jawa kang ana amarga majune pikiran lan budayane wong jawa.