nulis

Nulis Artikel Babagab Budaya Jawa

Nulis artikel kajaba kanggo nguri-uri budaya jawa uga bisa kanggo nambah kaparigelan nulis uga njembarake kawruh, amarga menawa gawe tulisan masthi ora bisa ucul saka golek sumber referensi kanggo nyengkuyung tulisan iku. Nulis uga bisa kanggo pakryan, merga tulisan kang apik diregani apik marang panerbitan. Kanggo latian iku bisa dikirimke menyang kalawati kang ana ing kuthane dhewe.

Kanggo latian nulis artikel coba semaken artikel ing ngisor iki!

Diuji Pintere, Pitaker Jujure

Ujian iku mung sarana kanggo mapanake dhiri lan nggayuh tataran tinamtu, dudu tujuan. Amarga yen mung dadi tujuan, sakabehing rekadaya bakal ditempuh, anggere bisa dianggep pinter utawa prigel. Banjur, apa sing paling penting ing sajroning pendadaran? Ing jagad pakeliran, ana lakon Pendadaran Siswa Sokalima. Iki lakon sing nyritakake pendadaran tumrap para Kurawa lan Pandhawa, murid-muride Pandhita Drona ing Paguron Sokalima. Tumrap murid-muride, malah tumrap sapa wae kondhang minangka gurune sok sing kepengin nggayuh jaya kawijayan guna kasantikan. Klebu guru ing bab menthang langkap utawa manah. Beda karo guru-guru liyane, Drona kapetung guru spesialis ing bab murid. Muride mung para satriya, mung anak ratu. Kurawa anak ratu Dhestarata. Pandhawa uga anak ratu Pandhu. Sing wis murud ing kasidan jati. Saliyane kuwi, ora bisa ditampa minangka putra siswane. Wektu-wektu tinamtu, Drona nganakake pendadaran. Pendadaran kuwi kanggo nodhi, nganthi tekan sepira temene ngelmu sing wis diparingake marang muride bisa kajiwa-kasarira, uga nganti tekan sepira keprigelane murid-muride anggone ngudi ngelmu. Pendadaran mau, sing kaprah diarani Pendadaran Siswa Sokalima, ora mung narik kawigatene murid-murid lan kulawargane, nanging nganti tumeka para kawula salaladan Ngastina. Saben-saben dianakake pendadaran, ora sethithik sing pada teka lan nonton.