Nyemak Pambagyaharja Penganten Jawa

Jejere wong Jawa nduweni unggah-ungguh basa sing susila sakjrone upacara adat jawa ana tata urutane kang kudu dijlentrehake. Ing babagan iki, upacara adat kang dibahas yaiku upacara penganten, mligine ing upacara lamaran. Kanggo miwiti nulis sambutan ing upacara lamaran kudu digatekake babagan ing ngisir iki , sengaja babagan nulis sambutan iki katulis nganggo basa krama supaya para siswa gladhen basa krama. Sebab ing kabeh micara uga tulisan kang asipat resmi kuwi amrih apike lan penere nganggo basa krama.

Basa Jawi menika pancen saleresipun radi riwil, awit saking kathahipun lan wonten trap-trapanipun. Mila manawi kagalih kirang pas, kasuwun sampun ngantos ngginakake tembung kawi ingkang dereng mangertos tegesipun. Tanggap wacana ingkang sae kedah saged ndudut rasa, pamedhar sabda anggenipun maraga saged ndudut rasa saha wibawa. Kanthi mekaten, mboten nilaraken tatakrama, miwah kasusilaan. Tatakrama inggih punika basa ingkang katata kacumbuhaken swasana.

Nyerat tanggap wacana kedah nggantosaken tatakrama, marsudi ing reh tata krama punika parikedah saged mumpuni saha mangertosi.

1.        Kawruh Kagunan Basa

Babagan kasustraan ingkang ngemu wedharing gagasan saking priyantun ingkang sampun pona, tinata endah.

2.        Bab Basa

Basa mekaten ingkang ngemu suraos (teges), piranti kangge pasrawungan ing antawis priyantun, lan sanesipun inggih menika basa ingkang kaprah dipun mangertosi bebrayan ageng.

3.        Basa Rinonce (Lagaking Basa)

Inggih punika unen-unen utawi tembung ingkang suraosipun langkung alus, saged milut lan dipun midhangetaken priyantun sanes, saha angel dipun tiru.

4.        Traping Basa Ingkang Leres Saha Sae

Pangertosan basa ingkang trep lan leres punika ngginakaken basa ingkang lugu lan lugas, luwes, lan gampil dipun tampi piyantun ingkang mirengaken.

5.        Karwi Jawa

Pratelan basa kina ingkang taksih kaginakaken ing pambiwara miwah pamedhar sabda. Tata urutanipun nyerat inggih menika:

a.    Nggantosaken acara punapa ingkang kedah dipunlampahi.

b.    Mangertos kanthi premati sinten ingkang jejibahan (ingkang kagungan kersa, besan, asma temanten, saha para utusan).

c.    Saged ngetrepake pangandikan ugi unggah-ungguh basa.

Kangge tuladha, cobi panjenengan gantosaken tuladha pasrah paningset (ngaturaken uga rampe lamaran) wonten ngandap punika!

Kula nuwun

Saha anggambali matur, mugi kawilujengan karaharjan, minggahipun katentreman tansaha kajiwa, kasarira ing hangga panjenengan lan kula.

Katur para tamu kakung saha putri, para pinisepuh, lan sesepuh ingkang tansah kinabekten sumrambah dhumateng para sinedhahan ingkang tansah winengku ing pakurmatan.

Sakderengipun kawula ngalajengaken atur, sumangga langkung rumiyin sesarengan kawula dherekaken manengku puja wonten ngarsa dalem Pangeran ingkang Maha Kuwaos, ingkang ngantos titiwanci menika taksih kepareng maringaken kamirahanipun dhumateng kula lan panjenengan sedaya. Awit sih rahmating kula lan panjenengan saged makempal wonten ing sasana pahargyan mriki kanthi manggih kawilujengan lan karaharjan sedayanipun.

Saha wonten kalodhangan punika mugi wonten keparengipun, mugi kula kalilanana matur satawis minangka sesulih saking panjenenganipun Bapa Anggoro Sasmaya sekalian, ingkang lumantar kawula kinen matur maligi dhumateng panjenenganipun Bapa Radite Lintang ingkang minagka sulih saking panjenenganipun ingkang hamengku damel.

Langkung rumiyin kawula ngaturaken mugi kawilujengan saha karaharjan tansaha kasandhing wonten ngarsa panjenengan. Ing salajengipun kula kepareng matur minangkani ingkang dados aturipun Bapa Anggoro Sasmaya sekalian, sepisan ngaturaken salam taklim mugi katur panjenenganipun Bapa Wibawa Maruta sekalian. Ing salajengipun anggen kula sowan minangka duta saraya pasrah paningset. Menggah punapa ingkang dados rerangken badhe kawula aturaken wonten ngarsa panjenengan:

1.      Saperangkat sarana ngadi sarira jangkep.

2.      Satunggal pangadeg minangka kangge penganten putri.

3.      Ageman jeningan ingkang maligi badhe kagem penganten putri.

4.      Saha dlancang etangan pajeng (arta) ingkang minangka buwuh pundhutan sarem.

5.      Majemukan jangkep.

6.      Lan pamesing ingkang arupi sarung lan nyamping, awit badhe calon penganten putri taksih anggadhahi eyang jangkep.

7.      Saha ing salajengipun taksih wonten uga rampe sanesipun ingkang mboten perlu kawula sebataken, awit mbujang wekdal.

Mekaten atur kawula, wasana menggah panampi sawetahipun kasumanggakaken. Saha kagalih wonten kiranging trapsila anggen kawula matur, kula tansah hanyayedhang lumunturing pangapunten.

Wassalamu’alaikum Wr.Wb

Hayu, hayu, rahayua ingkang samya pinanggih.

Nuwun.